صعـــلوك
وفين هتروح يا صعلوك
ده توب واسع ماهوش قدك
غالى وتمنه ما يقضى
فيه عمرين على عمرك
عريض وطويل على حلمك
بعيد بعدك عن الفرحة
يا بن الحزن والحيرة
وليل ساكنك بيتحكم
تكون فى الكون عليل عقلك
ما يفهم غير دروس جدك
بليد فى السوق ومتجنن
بألف قصيدة فوق يدك
تلف تدور وحيد وحدك
ما تلقى لا شارى ولا سامع
بطل فى الوهم تتملك
مساحة توهة لحروبك
مع نفسك وتتغلب
عليك وتهيم مع غيرك
تخش ميدان غريب عنك
تنادى الكل
مش كلك
وكلك يختفى فى بعضك
وبعضك يختفى فيهم
ويحضن خطوة التايهة
وفين هتروح يا صعلوك
وراس مالك فقط شعرك
وصوت مبحوح من السكتة
وعين مجروحة م العتمة
ورق دايب على حبره
وماضى جاى على مهله
وحلم خجول بيتوفى
على فراش السكوت بيموت
مشاعر عايزة تتنفس
والفين معنى مكتومة
متنفع غير فى اسطورة
فى قلب كتاب قديم مرمى
فى كومة حلمك الباهت
راس مالك حاجات خلصت
وعدى عليها مليون حلم
قمر واقف ماهوش قمرك
ايديك تتمد دى قصيرة
ـــــــــــــــــــــــــــــــــــــــــــــــــــــــــ
التصنيفات : غير مصنف |
